श्रवण मुकारुङ कटुवालपछिका समकालीन टावरिङ पोएट । नेपाली कविताको स्वरूपमा नै आमूल परिवर्तन ल्याउने यिनको कविता बिसे नगर्चीको बयान-लाई विश्व कविताकै मास्टरपिस कविताहरूको लहरमा निर्धक्क राख्न सकिने कविता हो । यिनको यो कविता सड़कमा ओर्ह्लिएको आम मानिसको आवाज समेत भएको हो । माथि माथि सैलुङ्गेमा, तिमी तारे भीर म लहरा, सुन रे सियाराम, राई माइलाले गाउँ छाड़्यो जस्ता कालजयी गीतका सर्जक समेत हुन् । यिनले जे छोएका छन्, सुन भएका छन् । जुनै विधामा पनि श्रवण पोख्त । भव्य । शालीन ।

कविताबाहेक गीत, नाटक, निबन्ध प्रायःजसो सबै विधामा स्टोरी टेलिङको जादू देखाउँछन् । अब पालो आयो उपन्यासको । स्टोरी टेलिङको नयाँ टेक्स्चर दिएर रचिएको सलह यिनको डेब्यु नोभेल हो। नेपालको स्थापित प्रकाशन संस्था पब्लिकेसन नेपालयले भर्खरै छापामा ल्याएको यस स्तरीय उपन्यासलाई भारतीय पाठकका लागि स्यालमेन्डर इम्प्रिन्ट्सले प्रकाशित गर्न पाउँदा हर्षबोध भएको छ । नेपथ्य : लोकप्रिय यात्राको अन्तरङ्ग-पछि पब्लिकेसन नेपालयसँगको यो दोस्रो सहकार्यलाई पनि भारतीय पाठकले सहृदय स्वीकार्नेछन् भन्ने बलियो आशा राखेका छौँ ।

उपन्यासकी मूल पात्र नायुमा र तिनका सहपात्रमार्फत् सुन्दर कथा उनेका छन् मुकारुङले । काव्यिक कथनशैली र भाषाको मृदुलताले सलह विशिष्ट बनेको छ । आकाशमा उड़्ने सलह अँध्यारो अँगाल्दै आउँछ तर यो सलह उज्यालो उघार्दै हजुरको हातमा आइपुगेको छ ।